Новости

Адырраҭара Сааҭ Наҟьак иаазыркьаҿу атеқсттә версиа / аҭыжьымҭа №48

23.04.2021


Адырраҭара Сааҭ Наҟьак иаазыркьаҿу атеқсттә версиа / аҭыжьымҭа №48

Мшаԥымза 9, 2021ш. имҩаԥысит акоронавирустә ҿкы аҽацәыхьчара иазку Акоординационтә штаб аилатәара. Анаҩсгьы аԥкра шацҵатәу иалацәажәеит Агәабзиарахьчара Аминистр Т. Цахнакиеи , Асанитартә ҳақьым хадеи Л. Скорики. Иумбар залшом ари аҿкы чымазара макьана ишҳалоу. Имаҷымхеит ачымазцәа. Уи зыхҟо, ҳажәлар изқәымныҟәо аԥкрақәа роуп: асабрада рхарҵаӡом, адистанциа рыбжьарҵом… Школқәак еиҭа акарантин иаҳмышьҭыр амуит, арҵаҩцәеи аҵаҩцәеи ахьычмазаҩхаз иахҟаны.

Хымԥада ари ачымазара раԥхьа иргылан ааха знаҭо ауаа ргәабзиара ауп, аха убасгьы ааха ду анаҭеит аекономикеи абизнеси. Иахьатәи ҳдырраҭара зызку ахы шԥамҩаԥнаго, абизнестә усура иҿыцу аҭагылазаашьақәа инарықәыршәаны.

Иахьатәи ҳдырраҭара иалахәуп Аԥсны анҭыҵ инхо ҳажәлар, абизнес знапалакәу – Адица Ҵышәбеи, Дырмит Аҳашбеи. Адица дынхоит Нидерланд, аус луеит афинанстә усӡбаҩс ИКЕИА акомпаниаҿы ақ. Лиадан. Дырмит иҭаацәеи иареи нхоит Москва, еицырдыруа акрыфарҭа Ача –Чача , Ривиера аԥшәмацәа дыруаӡәкуп. Иара убас дсасны даҳҭоуп Пицундатәи акурорт ахеидкыла аменеджер Азамаҭ Багателиа.

Апандемиа иахҟаны еиԥшымзаарас ирымоузеи ҵыԥхтәи аԥкрақәеи, уажәтәии? Иазнауеи уи абизнес аҿы?

А.Ҵышәба: ИКЕИА абизнес ааха ду анаҭеит аҵыхәтәаны иҟалаз ахҭысқәа. Мызк аԥхьа адәқьан еиҳабыс сыҟан, уа аус руан 600-ҩык ауаа. Апандемиа ианалага, хымԥада адәқьан аҳаркит. Акомпаниа иаҵанакуаз адәқьанқәагьы адыркит, уи даара ианыԥшит иара афинанстә ҭагылазаашьа. Аха ҳа ҳзын ихадароуп ауаа ргәабзиара. Убри азы ҳусура ҽа хырхарҭак аҳҭеит. Иааҳартит Зуум аплатформа. Онлаин аусура маншәалахеит аахәацәеи ҳареи ҳаиҿцаараҿы . Аҩны иштәоу ирҭахәу атауар ҿарҵар алшоит. Ҽакала иаҳҳәозар адистанционтә усура ҳаҿуп. Ҳа ҳҿы даара ҭакԥхықәрала иазнеиуеит иаԥҵоу аԥкрақәа зегьы. Уажәыгьы иныҟәаҳгоит анапхаҵақәа , асабрадақәа. Ӡәыр дычмазаҩхар, х-мчыбжь акарантин дҳашьҭуеит.Аусурахь деиҭагьежьыр алшоит, атест мап анаинарбалак.

Зныкала иааир алшоит 50-ҩык аахәаҩцәа, урҭ анцалак иааиуан аҽа 50-ҩык.

Онлаин иҟарҵаз атауар азы ианааилак, рмашьынақәа рҿы иазыԥшуп, аусуҩ ирызнаган уа ириҭоит. Ҳбизнес аусушьа аҽеиҭанакит, аха уеизгьы аус шауц иауеит.

- Дима, аусурақәа шԥацои Москва?

Д. Аҳашба: - Хымԥада уажәыгьы зегьы иацныҟәоит иаԥҵоу аԥкрақәа. Аха уи ишахәҭәу иацымныҟәақәогьы ыҟоуп, избанзар ауаа ааԥсеит, иҟалаз аҭагылазаашьа иашьцылеит.

Ҳара ҳбизнесгьы егьырҭ абизнесқәа реиԥш, ааха ду аиуит. Иашоуп ҽа хырхарҭак ала ҳалагеит азнеира, аха уи алҵшәа даара икәадахеит. Ауаа акрыфарҭақәа рахь изнеиуа акрыфара мацара азы акәӡам, еибабарц, еицәажәарц, рыԥсы ршьарц. Ирҭахәуп атмосфера ԥшӡаҿы аамҭа рхыргаларц.

Азҵаара ӡбашьас иаҳбаз, афатә аҩныҟа рызнагароуп. Аха уи абизнес ԥхьаҟа изагом. Алҵшәа анаҭом. Хықәкыс иҳамоу аусуцәа,аколлектив реиқәырхароуп. Уажәы еиҭааҳартит ҳашәқәа, ҳаиҭалагеит аусура.Ҳусуцәа зегь асабрадақәа рхоуп, аишәакәа хазы-хазы инаскьаганы игылоуп. Аха иааиуа аклиентцәа асабрадақәа рхаӡам, хәарҭас иамоузеи аусуцәа уи ахьырхо? Убри маҷк исзелкаауам. Аусуцәа жәамш рыла знык иарҭоит атестқәа.Ҳусуцәа еиҳараҩык ачымазара рхыргахьеит.

- Азамаҭ, ҵыԥх ҳкурорттә сезон ихьшәаны иалагеит. Са издыруеит асезон алагаратә усқәа активла уҽшалаурхәоз. Иаԥҵази ҵыԥх , иаԥҵеи сынтәа ԥкрақәас, иааиуа акурорттә сезон азы ажәлар ргәабзиара ахьчаразы?

Багаҭелиа А.: Ишаадыруа еиԥш Аԥсны акурорт туризм ихадоу еканомикатә шьаҟароп (отрасль). Еиҳарак иаҳзаауа аурысцәа роуп, азы Роспотребнадзор иҳанаҭоз адгаларақәа зегь ҳадаҳкылеит, акурорт аартразы. Ӷәӷәалагьы ҳҽазыҟаҳҵеит. Иахәҭаз азгәаҭақәа зегь ҳрықәныҟәо.Ҳорганизациа иамоуп аполиклиника, урҭ иаауази, ицози зегь рсиа рыман. Зымцашоура ҳаракыз ианаамҭоу иахәҭаз ацхыраара иауан. Хазы иҟаз акорпус ахь иҳашьҭуан. Рыкрыфара акәзар имҩаԥган расписаниала. Ауаа рацәа ҟамларц, рхыԥхьаӡара маҷны иҩнарҵон. Обиектцыԥхьаӡа ирыман ахыхьчагатә дезинфекциақәа злаҟарҵаша.

- Ара Дима иҳаиҳәеит, ишрылшаз русуцәа зегь рҭыԥқәа рҿы рааныжьра. ИКЕИА аҿы ишԥаҟоу? Адица ишәзеиқәырхама шәусуцәа зегь рҭыԥқәарҿы рааныжьра? Аҳәынҭқарра цхыраарас ишәынаҭозеи?

Ҵышәба А. Апандемиа шалагаз инаркны адәқьанқәа зегь адыркит, иаркуп уажәыгьы. Аусуцәа аӡәгьы амҳамхӡеит, рҭыԥқәа еиқәырхоуп. Аус шырымуагьы рулафахәы раҳҭоит. Иашоуп азарал ҳнаҭеит, аха уи аҳәынҭқарра иханарҭәаауеит. Уа ацхыраара ҟарҵоит ишахәҭоу.

Аҳашба Д.Ҵыԥх аҭагылазаашьа аҽанаԥсахнатә, ирылаҳәан абизнес ацхыраара. Акредит аӡбахә цәырган, аха ауаа уи агара иахымццакит, избанзар раԥхьаҟа ирԥеиԥшыз рыздыруамызт азы. Европеи Урыстәылеи еиҿҳарԥшозар, Урыстәылаа аҳәынҭқарра аҟнытә цхыраарас ироуз 20% ауп. Насгьы налогқәак раԥыхра ҟаҵан акарантин аамҭазы.

- Аԥсны уи аганахь ала аҭагылазаашьа зегь реиҳа иуадаҩын. Азамаҭ цхыраарас иҟази аҳәынҭқаррантә?

Багаҭелиа А. Иашоуп, ҳҭагылазаашьа цәгьан. Уи азы иаԥҵан аналогтә ԥсшьарақәа, еиуеиԥшым ахкқәа рҿы. Еиқәҳархарц ҳалшеит аусуцәа рулафахәы. Ииаҳгеит онлаин усурахь. Апандемиа гәарлаанӡа ирацәан иаар зҭахыз ауаа, зхыԥхьаӡара асиа ианыз. Аха нас урҭ рымҩақәҵагақәа рыргьежьра иалагеит,аҳәаа ахьадыркыз иахҟьаны. Ҳҳәынҭқарра ҳацхрааит абарҭ иҟаз амҩақәҵагақәа рыргьежьра армаҷраҿы, уи ииаргон иааиуа ашықәс ахь.

- Уажәы ирацәоуп авакцина иақәгәыӷуа. Аԥсны авакцинациа макьана иҟаӡам. Ишԥамҩаԥысуеи уи шәа шәҿы? Насгьы иҳабжьажәгар алшои уи аганахьала? Ишԥажәбои абизнес ԥхьаҟатәи аԥеиԥш?

Ҵышәба А.- Араҟа ихадароуп агәкамҳара,ԥхьаҟа ацара. Иарбан ҭагылазаашьалак иҟало уацәымшәароуп, уазхәыцроуп ԥхьаҟатәи уус шцаша. Иудыруазароуп ухы шымҩаԥугаша еиуеиԥшым аситуациақәа рҿы.Аклиентцәа иааиуа,еиӷьу атмосфера рзаклхра уашьҭазароуп.

Онлаин бизнес 2005ш. инакны аус алаҳуеит, аха аҵыхәтәантәи 12 мыз, онлаин мацаралоуп аус шаҳуа. Шықәсык аԥхьа онлаинла аус шаҳуло здыруадаз, уи еиԥш ахәыцрақәа аӡәгьы ҳхаҿы иҟамызт. Аха ишыжәбо, аамҭа иаҳнаҭаз аҽеиҭакрақәа ҳаҽрықәҳаршәар акәхеит.

Ҳусуцәа ари аҽеиҭакрақәа ирцәымшәарц, ирыдаагалеит онлаин акурсқәа ирхысырц. Ус иагьыҟарҵеит. Адгылара раҳҭеит инҳмыжьит усурада.

IT-технологиа ԥхьаҟа ицоит, кыргьы аҽаԥсахуеит, ҳара ҳазыҟаҵазароуп уи аҽақәыршәашьа.

Сгәы иаанагоит ҭагалан ҳаиҭахынҳәуеит досу ҳусурақәа рахь, иаҳдыруа арежим ала. Уажәы ҳара ҳҿы ицоит авакцинациа. Уи хәҭа-хәҭалоуп ишымҩаԥырго. Зны аҳақьымцәеи, арҵаҩцәеи, абыргцәеи роуп иззыҟарҵо, нас егьырҭ зегьы. Аҳәынҭқарра иаанашьҭуеит абӷьыц авакцинациахь уаазыԥхьо. Уа иануп ианузыҟарҵо аҽҳәара.

Аҳашба Д. Москва ирацәоуп авакцинациа ахьыҟауҵаша аҭыԥқәа. Уаарацәакгьы ыҟам ус, сахьахәаԥшуа. Урыстәыла ауаа рхыԥхьаӡара 140 милл. ахьыҟоу, авакцинациа ҟазҵахьоу 8 милл. ҩык роуп. Иуадаҩӡам авакцинациа аҟаҵара. Ахәаахәҭратә центрқәа рҿгьы иҟоуп ус еиԥш иҟоу алшара. Ухаҭара узырбо ашәҟәы дурбоит, авакцинациа узыҟарҵарц, уаҳа акагьы аҭахӡам. Аха ауаа ахыццакӡом уи аус.

Аҵыхәтәантәи 4,5 мзы Москва ирацәахеит аҳәаанырцәынтәи асасцәа. Дара ртәылақәа рҿы иҟоу аԥкрақәа ӷәӷәоуп, уи уқәымныҟәар руӡом. Ргәы ԥнаҵәазар акәхап арахь изаауа. Маҷк рыԥсы ршьарц, ргәы рхашҭырц азы.

Аҭагылазаашьа ас ишыҟоу ицалозар, аус ҳулоит онлаин аҿаҵарақәа рыла. Афатә хкқәа аҩнынӡа рызнагара ҳазыхиоуп. Ирацәоуп акрыфарҭақәа аҿкы ачымазара игәарлаз иахҟьаны зусура еиҭазышьақәмыргылаз. Уи угәы унархьуеит ҳәарада.

- Аԥсны авакцинациа иаламгаӡацт. Ачымазцәа рхыԥхьаӡара еиҭацло иалагеит. Макьана ашәарҭара ҳамоуп, арахь акурорт сезон ааигәахоит. Азԥхьагәаҭас иҟоузеи ?

Багаҭелиа А. Ҳазԥхьагәаҭақәа рыла сынтәа миллионк инарзынаԥшуа атуристцәа ҳзаараны иҟоуп. Ишыжәдыруа еиԥш тәылақәак рҿы аҳәаақәа аркуп, аурыс турист изы. Излаҳалшо ала ҳацклаԥшлароуп ргәабзиарахьчара ирықәшәо аԥҟарақәа, аԥсшьаратә обиектқәа рҿы. Уи азы иаҭахәуп зегь ҳаидгыланы, коллективла ҭакԥхықәрала азнеира. Убасҟан ауп даргьы Аԥсныҟа аара аныргәаԥхо.

- Иҭабуп ҳәа шәасҳәоит ихәарҭоу, аинтерес зҵоу ҳаиҿцәажәараз! Ҳгәыӷуеит ҳкурорттә сезон бзиахап ҳәа! Уи шәынтә еиҳанатәуеит ҳҭакԥхықәрақәа, аҿкы аларҵәара аԥкра азықәԥараҿы.

Ҳзыӡырҩцәа рахь схы нарханы исҳәарц сҭахуп, иҟалозар шәҽеиушәмыжьын, ачымазара шәҽацәышәхьчала! Ишәхашәҵала асабрадақәа, ишәыбжьашәҵала адистанциа. Ишәыхьча шәгәабзиареи, шәҭаацәа ргәабзиареи!

Сгәы иаанагоит ҳа ҳҿгьы авакцина иаарласны иалагоит ҳәа.

Ҳгәыӷуеит шәбизнесгьы, ҳаҭыр зқәу ҳасасцәа, ишахәҭоу аус ауп ҳәа!


  • Facebook
  • Вконтакте